გზამკვლევი ეკონომიკურ რეფორმებში
ჩვენი სამეწარმეო სამართლის საკანონმდებლო ბაზა უკვე მშობლიურია ევროპელი იურისტისთვის და ბიზნესმენისთვის. ამას აქვს დიდი ეკონომიკური დატვირთვა, როდესაც ევროპელ პოტენციურ ინვესტორს ე.წ. მშობლიური სამართლებრივი გარემო ხვდება, - ამის შესახებ ინვესტორთა საბჭოს იურიდიულმა ექსპერტმა გიორგი ჯუღელმა ბიზნესპარტნიორის პოდკასტში, „გზამკვლევი ეკონომიკურ რეფორმებში“ განაცხადა.
მისივე ინფორმაციით, მეწარმეთა შესახებ ახალი კანონის ერთ-ერთი მთავარი ამოცანაა ევროკავშირის კორპორაციულ სამართლებრივ დირექტივებთან მორგება.
„1994 წლის კანონს თავისი ფუნქცია ჰქონდა ქვეყნის განვითარების ეტაპიდან გამომდინარე. ეს იყო პირველი კანონი, რომელსაც ხელი უნდა შეეწყო ქვეყნის საბაზრო ეკონომიკის რელსებზე გადასვლისთვის. მისი ამოცანა იყო პირველი საფუძვლების შექმნა იმისთვის, რომ ინიციატივიან ადამიანებს შესაძლებლობა ჰქონოდათ თავისი ინიციატივებისთვის სამართლებრივი ფორმა მიეცათ. ძველმა კანონმა ეს ფუნქცია კარგად შეასრულა, მაგრამ როდესაც ქვეყნის განვითარების დღის წესრიგში დადგა ევროპეიზაცია, მათ შორის, სამართლებრივი გარემოს ევროპეიზაცია, ბუნებრივია ამ ამოცანის შესრულება საჭირო იყო. შესაბამისად, ბიზნეს გარემო უფრო დახვეწილი გახდა, უფრო მეტი მოთხოვნა გაუჩნდა, მათ შორის, კანონმდებლის მიმართ, რომ ესა თუ ის ურთიერთობები უფრო დეტალურად მოეწესრიგებინა. პირველი ამოცანა ამ კანონის, სწორედ მოდერნიზაცია იყო და მეორე არანაკლებ მნიშვნელოვანი ამოცანა, რომელიც დაემატა უკვე 2016 წლიდან ეს იყო ევროკავშირის კორპორაციულ სამართლებრივ დირექტივებთან ჩვენი სამეწარმეო სამართლის მორგება.
ძველი და ახალ კანონის კონცეფცია არ შეცვლილა. გარკვეული ჟანგბადი მხარეებისთვის, რომ განსხვავებულ პირობებზე შეთანხმდნენ, ვიდრე ამას კანონი სთავაზობს, ბუნებრივია, დარჩა და კერძო სამართლისთვის, მათ შორის, ბიზნეს სამართლისთვის ეს ჟანგბადი აუცილებლად უნდა იყოს. წინა კანონსა და ახალს შორის ერთი პრინციპული განსხვავება არის დეტალურობა და მეორე, კარდინალური განსხვავება ეს არის დირექტივებთან შესაბამისობა, ანუ ევროპული კანონი.
ჩვენ არ გვქონდა მინიმალური კაპიტალი კორპორაციებისთვის. ევროპული დირექტივა ითვალისწინებს სააქციო საზოგადოებისთვის სავალდებულო მინიმალურ კაპიტალს 25 000 ევროს ოდენობით და ჩვენს ახალ კანონში მინიმალური განთავსებული კაპიტალი სააქციო საზოგადოებისთვის არის 100 000 ლარი. გარდა ამისა, ევროპული დირექტივა იმისთვის არის, რომ კორპორაციული პროცედურები ისე გაწეროს, რომ ევროკავშირის სივრცეზე ჰარმონიზაციის მინიმალური ზღვარი იყოს მიღწეული. ეს არ ნიშნავს, რომ ყველა წევრი სახელმწიფოს სამეწარმეო სამართალი ერთიანი იქნება, მაგრამ ის პრინციპები რასაც ის ეფუძნება ერთიანი იქნება. ამ კანონიდან გამომდინარე, ჩვენი სამეწარმეო სამართლის საკანონმდებლო ბაზა უკვე მშობლიურია ევროპელი იურისტისთვის და ბიზნესმენისთვისაც. ამას აქვს დიდი ეკონომიკური დატვირთვა, როდესაც ევროპელ პოტენციურ ინვესტორს ე.წ. მშობლიური სამართლებრივი გარემო ხვდება.
ამ კანონით რეგისტრაციები უკვე ხორციელდება და სტატისტიკური მონაცემებით, რეგისტრაციების თვალსაზრისით, განცხადებების 97% პირველივე მიმართვით სრულდება. რაც შეეხება 3%-ს - ვერც ერთი წამყვანი ქვეყანა ვერ დაიკვეხნის, რომ არსად არც ერთი რეგისტრაცია არ გაპრობლემებულა. ეს ისეთი კანონია, რომ თუ რაიმე გამოწვევები აქვს ეს ძალიან მალე გამოვლინდება.
კანონის ფარგლებში შემოვიდა კონკრეტული თარიღი, რომ კომპანიების ხელახალი რეგისტრაცია მოხდეს. რომ დავუბრუნდეთ 1994 წლის კანონს - მაშინ კორპორაციული საბუთები იყო ისტორიული წესდება და იყო გორა ცვლილებებისა. ანუ საწარმოს დღევანდელი მდგომარეობა, კორპორაციული ცვლილება, რომ ვინმეს გაეგო მთლიან კორპორაციულ ანალიზს საჭიროებდა. კონსოლიდირებულ ვერსიამდე მისვლა პაზლის აწყობასავით იყო. დღეს კანონი დირექტივიდან გამომდინარე ითხოვს, რომ სადამფუძნებლო დოკუმენტაციის ცვლილების დოკუმენტთან ერთად საჯაროდ ხელმისაწვდომი იყოს კონსოლიდირებული ვერსია, ანუ თანამედროვე ვერსია. იგივე მოთხოვნა, რომ ძველი კანონით დარეგისტრირებულ საწარმოებს შეხებოდა ამიტომ დაწესდა ეს ხელახალი რეგისტრაციის ვალდებულება. ხელახალი რეგისტრაციის შემდეგ დოკუმენტების გორა გადაიქცევა ერთ კონსოლიდირებულ დოკუმენტად“, - განაცხადა გიორგი ჯუღელმა.
როგორც გიორგი ჯუღელმა აღნიშნა, თუ მეწარმე ხელახალ რეგისტრაციას არ გაივლის, პირველ ჯერზე გარკვეული შეზღუდვები უწესდება, ხოლო შემდეგ საწარმო ადმინისტრაციულად უქმდება.
ანი მუმლაძე
წყარო: bp.ge სტატია
